Zur Hauptseite

E-Mail

GELBFIEBER

CALI & STÄFFE 2015

Cali:
(Mit Mundschutz)
mmmpfggggrrgmbl...hdhdg...pfffmpghf...
Gueten Ooobe, mini Daaame und Heere: Sie sind jo
waahnsinnig, ohni Mundschutz oome z'laufe.
Ganz Willisau isch versiicht – he jo, mir hän en Epidemie!
D'Grippe-Impfig hett dodaal versaagt.
Gestatte: Dr. Waldemar Burckhardt – Burckhardt mit ck-dt!
Sonderbeuuftraagte vo de Klovartis zur landeswiite Iidämmig
vo deere Epidemie.
Es herrscht Alarmstufe root – nai: Alarmstufe gääl.
Denn unseri Exbeerde hen uusegfunde, dass es sich bi däm
Viirus um en hochaasteggendi und sich rasant uusbreitendi
Foorm vo Gälbfieber handlet.
Die Viire sind iberall, sie bedrohe uns an allne Egge und Ände:
DIE GELBE GEFAHR!

Auftritt Stäffe mit „Hoch auf dem gelben Wagen“


Cali:
Do, sehn sie: En Prachtsexemblaar vo dem Virus Postalis.
Das miemmer sofort in Quarantäne verbanne.

Stäffe:
Was bisch du für eine?
Hesch du überhaupt scho nes Ticket zoge?

Cali:
Tigget? Wa für ne Tigget?

Stäffe:
Wie tigget denn dä, heimatstärne? Hesch ned gwösst, dass du zerscht muesch es Ticket zieh, bevor du mitere Autoritätsperson vo de Post darfsch schnorre, he?
Ich bin der GELBE RIESE!

Cali:
Hösch, dä glai Virus isch glaub greessewahnsinnig...
Derby isch unsri Baasler Fasnacht auf dr Liste vom immaterielle Kultuurerbe vo der UNESCO und...

Stäffe:
Jetzt los emol, Bürschtali...

Cali:
...und unsere FCB isch Maischter und Tabellefiehrer
und der FCL am Schwanz und...

Stäffe:
Rueh, jetzt! Es länget!
A üsere Fasnacht werd düütsch gredt!
Entweder tuesch di jetzt sofort integriere und so rede,
dass mer dich verstoht oder ich gohne hei
und du chasch das Theater allei wiiter mache.
Hesch verstande???

Cali:
Joo, aaber...

Stäffe:
Nüd aber. Öb d'verstande hesch, hani gfrogt?

Cali:
Okay, Stäffe, isch jo schon guet...
Aber s'Problem isch dodemit ned glöst.
Das gälbe Virus isch omnipräsent, wenn d'gosch go poschte.
Vom Hotel Post übere Postplatz zur alte Post bis zur neue Post: alles gälb.

Stäffe:
D'Bahnhofstross wird zur Postgass.

Cali:
Die nächsti Post isch au bald fertig: Im Sigristehus bim Heilig Bluet entstoht en Filiale vo de Post Finance. Miteme vergitterete Hochsicherheitstrakt vom Feinste.

Stäffe:
Reini Verschwändig. Typisch Banke. Für das hätted sie au
s lääre Amtsgfängnis chönne bruche.

Cali:
Hends jo wölle, aber de Kantonalbank-Tschuppi hett Ispruch gmacht.

Stäffe:
I de Chäppalimatt hinde entstoht es nationals Logistikcenter für die eidgenössischi Fläsche-Post.

Cali:
Im Ostergau baue mer d'Post-Ost.
D'Post Däiu wird zur Göggali-Post.

Stäffe:
Und für alli Chonde gitts bim neue Linde-Wirt
gratis es Glas Schüle-Most.

Cali:
D Postagentur Rohrmatt reagiert innovativ
uf d'Euro-Krise: Det channsch am Postomat bereits
griechische Drachme use lo und im särbelnde Sagali demit zahle.

Stäffe:
In Sache Eurokrise isch Willisau sowieso de Ziit vorus. Mer hend das gseh cho und rächtziizig de Aldi, de Lidl und de Müller agsiedlet.

Beide:
Statt uf Konstanz use fahre
Chasch bim Poste deheime spare:
Aldi, Lidl, Müller
Mensch ist das ein Knüller
Schnäppli jage chamer ganz famos
Z'Chli-Dütschland a de Ettiswilerstross!

Stäffe:
Aber simmer ehrlich: Dä Müller hätt's ned au no bruucht! So schlimm isch es de doch ned mitem Gälbfieber z'Willisau, dass mer no meh Pillali und Sälbali nötig hättid.

Cali:
Das meinti au. Aber s'schlimmste isch, dass s'Büsi-Hildi dä Lade bauet hett.

Stäffe:
Waaas? S'Büsi-Hildi?

Cali:
Logo: Alles Müller oder was: Tscheggs es? Dä Bau isch doch bloss en raffinierti Wärbesüüle für ihre Lieblings- Ständerotskandidat!

Stäffe:
Tamian nonemau, was für ne cleveri Frau!
Aber was, wenn dä ned gwählt wird?

Cali:
Denn wandlet s'Büsi-Hildi dä Lade eifach ines Fotostudio um für de Selfie-Müller vo Bade.

Stäffe:
Oder es gitt en wiiteri Post: für posttraumatisierti Wahlkämpfer.

Cali:
Interessant isch au das neue Motel-Projekt a de Ettiswilerstross. Mit dem komische Name: Peter und Paul.

Stäffe:
Meinsch, gitt das so nes Etablissement, so nes Speziells, also jo... halt so für... ich meine: vo Maa zu Maa?

Cali:
Aber nei au, Stäffe, doch ned grad näbem Bestatter.

Stäffe:
Dä isch ned so heikel. Mitem Sport-Rock im gliche Gebäude isch er jo au es Joint Venture iigange und tued d'Schnapsliiche zumene Sonderpriis entsorge.

Cali:
Wenn er de nume keini Schiin-Tote verwütscht, wo mer K.o- Tropfe is Hürlimaa-Bier gschüttet het...

Stäffe:
Dumme Chabis, mir sind doch ned z'Zug. Stell dir vor: de Schaller Seppi würd öffentlich mitere Grüne umemache.
 
Cali:
Warts ab: Für ne Liste-Verbindig macht d SVP fast alles!
Und medizinisch betrachtet isch d'Liste halt emol under de Gürtellinie.

Stäffe:
Isch jo eh alles Wurst i de Politik. So ähnlich luutet jo s Motto vom Regierigs- und vom Kantonsrotspräsidänt.

Cali:
D'Wurst isch tatsächlich en verlässliche Indikator für die politischi Gsinnig.

Stäffe:
Nochem Motto: Zeig mir, wie du isst, und ich sag dir, was du bist.

Cali:
Wenn öpper d'Gable z'erscht as einti und denn as andere Ändi vo de Wurst setzt, dä Vorgang mehrmols wiederholt und die Wurst denn schliesslich i de Mitti aaschniit, denn isch er bi de CVP.

Stäffe:
Wenn sich öpper binere Grillparty zielstrebig uf die vercholete Würst stürtzt, denn isch er bi de Liberale: Qualität spielt kei Rolle, Hauptsach schwarz.

Cali:
Wenn öpper luut en Schüblig bstellt und denn ganz diskret es Filet isst, denn isch er bi de SP.

Stäffe:
Wenn öpper die Wurst vo Hand ist und bim Ässe so richtig schmatzt, sprützt und dräckelet, denn isch er bi de SVP.

Cali:
Wenn öpper die Wurst mitere Miene vo de Verachtig a Tällerrand schiebt und sich deför mit Hingab em Sänf widmet, so isch das en Grüene – verstoht als Vegetarier nüd vom Fleisch, gitt aber trotzdem zu allem de Sänf.

Stäffe:
Di Grüenliberale ässed en Art Designer-Wurst: Sie gseht vo usse guet us, aber mer weiss eifach ned genau, was dinne isch.

Cali:
Also bim Wurst ässe gohn ich frömd: Ich ha am liebste italiänische Mortadella.

Stäffe:
Und ich östrichischi Conchita.

Cali:
Bi üs muesch jo froh si, wenn a de Fasnacht no ne Worscht öberchonsch. Die halbe Beizer hend de Lade zue.

Stäffe:
De best Willisauer Gastronom wirtet sowieso z'Gättnau.
Sini Huus-Spezialität:

Beide:
Ankebock vom Ankeloch!

Cali:
Deför hett de Chines wieder offe.

Stäffe:
Nome weiss das kei Chnoche!

Cali:
Im Untertor gitt's en exklusivi Zunftmeister-Pizza.

Stäffe:
Bloss, dass sie de Limi uf de Charte zum Heinivater gmacht hend.

Cali:
Und die neusti Innovation vom Törli: Pizza-Service Tele Napf.
Wenn sie a de Fasnachtseröffnig bstellsch, chonsch sie am Äschermittwoch über.

Stäffe:
Guet hemmer no üses Bermuda-Drüegg Stärne-City-Tübali.
So macht sie wenigstens Sinn im Städtli: die blaui Zone.

Cali:
Nome Post getts im Städtli no keini. Logo, dett hetts au viel weniger Parkplätz als im Bahnhof unde.

Stäffe:
Im Gägeteil, im Städtli schaffet mi grössti Konkurränt: de Keiser Hugi mit sinere DHL-Annahmestell.

Cali:
Dä het halt d Koste im Griff, im Gägesatz zu dim riesige gälbe Lade. En richtige Vorzeige-Chrämer,

Stäffe:
Wieso meinsch?

Cali:
Jede Morge früeh, wenn ich zum Schwägler Mägi gohne go Brot poschte, duet im Hugo sini Ladetochter sorgfältig wüsche vorem Gschäft und lauft denn mit dem Güselschüfeli vom Amtshus zum Rothus öbere und tued de ganzi Dräck im öffentliche Güselchübel vo de Stadt entsorge.

Stäffe:
S'wird Ziit, dass mer au im Städtli e richtigi Post tüend eröffne.

Cali:
D'Stadtmühli hättisch müesse chaufe. Gälb aagmolet wär die jo scho. So chasch die rote Zahle elegant überdecke.

Stäffe:
Hani scho postet. Die neue Bsitzer sind nume
mini Strohmänner. Abem 1. März isch das de neui Standort vo de Willisauer Hauptpost.

Cali:
Und die ganzi Müligass wird zur gälbe Zone.

Stäffe:
Muesch aber zum Parkiere z'erscht es Ticket löse bim Trompeter vo Säckinge.

Cali:
Was isch denn das für eine?

Stäffe:
Üse Pfarrer Martin.

Cali:
Öb das guet chond? Dä hett jo a de Narremäss es ziemlichs Martinhorn gha.

Stäffe:
Guet isch üse Bischof ned so stur wie dä vo Chur.

Cali:
Do bini ned so sicher. Ich glaube einfach, z'Solothurn chönd sie nüd gäge üse Schwöbele-Pfarrer undernäh, weil sie sine Dialäkt ned verstöhnd.

Stäffe:
Zrogg zur Stadtmühli-Post: Mir wend a de Müligass Synergie nutze und fusioniere die neui Hauptpost drum mit de Stoff- Zentrale.

Cali:
Sowieso, die Post isch jo scho längst en Gemischtwarenhandel.

Stäffe:
Lanciert wird das neue Geschäft miteme Wärbespot im Schwiizer Färnseh. Mir hend för dä Biitrag en absolute Superstar chönne gwönne!

Cali:
Grüezi, mi Name isch Fischer vo de neue Filiale Willisau von de Fischer Bettwaren-Fabrik. Mir fabriziered nordischi Duvet und Chüssi in Topqualitäte i jeder Grössi und verchaufed diräkt ab Fabrik.

Do wärde die polnische Gänsedaunen und Fädere vo tote Tier gwäsche, tröchnet, entstaubt und sortiert.

Do chönd sie Qualitäte vo de Daune und Fädere ussueche und zueluege, wie ihres persönliche Wunschduvet oder Chüssi härgstellt wird. Au d Füllmängi chönd sie sälber bestimme.
Do auf dene Maschine wärde Karo gnäiht, damit d'Daune nömme verrötscht.

Das isch öisi Bettware-Reinigung. Wenn sie sich telefonisch tüend aamälde, chönd sie grad deby sy und zueluege.

Mer freued eus uf ihre Bsuech i de neue Filiale von de Fischer Bettwaren-Fabrik do im schöne Städtli Willisau.

Stäffe:
S neue Gulp-Quartier müesste mer au no mitere Post-Filiale erschliesse.

Cali:
Am beste i de Waldrueh – det goht jo ganz schön d'Post ab!

Stäffe:
Isch jo au kei eifachi Ufgab, so no grosse Lade z'füehre.

Cali:
Ei Person allei schafft das ned. Mer hätted do en kreative Vorschlag a d'Verbandsleitig:

Beide:
Wär söll bloss i die Waldrueh ue
Ornig schaffe und wieder Rueh?
Wär entspricht bloss i dem Profil
Hett en markige Füehrigs-Stil?
D Lösig liit im'ne Job-Sharing
S brucht zwe Fraue mit herte Gring
Gwählt müend wärde und das ganz fix:
S Schwägler Mägi und s Grüter Trix!

Stäffe:
So, es isch Zyt: Mer chömed zur Verleihig vo de beliebte Post- Awards für die drei grösste Flops vom Johr 2014.

Cali:
Platz 3 goht an Präsidänt vo de Stadtmusig, Hansruedi Bättig.

Stäffe:
O Tannenbaum, o Tannenbaum
Wie dürr sind deine Blätter
Du brennst so schön zur Weihnachtszeit
Kein Feuerlöscher weit und breit
Oh Tannenbaum, oh Tannenbaum
Es fehlt der Bucheli-Brandschutz-Schaum!

Stäffe:
Platz 2 goht an Knox Troxler.

Cali:
Spot am Obe vo Lozärn
Wott de Knox schnell heiwärts gärn
Fohd im Zug bald afo pfuuse
Dööset wiiter in Wolhuse
Tued im Äntlibuech verwache
Das allei wär scho zum Lache
Uf Wolhuse zrogg goht's gschwind
Spurtet wie de biesig Wind
Hechtet i de nächstbest Wage
Bald schon ghört mer Knox luut chlage:
Tami, ich wett so gärn hei
Doch jetzt bini z'Wärthestei!

Stäffe:
Und Platz 1 goht – wie chönnts anderst sii:
a üsi liebi Post. Sie überchonnt dä Priis für ihri innovative Öffnigsziite.

Cali:
Gosch am Morge früeh uf d'Post
Frürsch de Ranze ab im Frost
Vorem Schaffe tueds ne gruuse
Lieber no chli länger pfuuse.

Stäffe:
Wottsch du denn go s Postfach lääre
Tüend sie fröndlich dir erkläre
Sigisch föif Minute z'spot
Bis am Mittag nüd meh goht.

Cali:
Noch de Arbet denn no gschwind
S'Päckli für mis Gottechind
D'Pöstler löhnd sich ned lo störe
Stohne vor veschlossne Töre.

Beide:
So chas nömme wiiter goh
Willisau muess zämestoh
Es isch eifach nur e Schand:
Neue Pöstler braucht das Land!

Cali:
Wär chönnt das si...?

Stäffe:
De Cali...

Cali:
... und de Stäffe!

Cali – Stäffe – Cali – Stäffe – Cali – Stäffe usw.