Zur Hauptseite

E-Mail

BIER-IDEEN

CALI & STÄFFE 2013

Cali:
Ich bi s Mägi vo Willisau
Stadtbekannt als Bäckersfrau
Muess jetzt aber – das glaubt kei Sau –
Würscht verchaufe und Ufschnitt au!

Gflüchtet isch üse Willimaa
S'Städtli stoht ohni Metzger da
Fleisch chasch neustens bim Weibel ha
Bloss wird dä bald uf Soorsi gah.

Rette muess ich die Städtli-Gwärbler
Dass die ned immer wiiter särble
Muess als einzigi Frau uf Ärde
Im mim Alter no Metzger wärde.

Wär seit, das sig en Bier-Idee?
Ich bin innovativ sit je
Chaufsch bi mir morn en Pfünder Brot
Gitts als Zuegab es Entrecôte!

Und apropos en Bier-Idee:
Eichhof suufe mir au keis meh
Müend mir trinke dä Saft us Chur
Wärde mir wie dä Bischof stur.

Nei, mir bruched es eigets Bier
Eis wo mundet i dir und mir
S'erschte Fässli wird hött a'zapft:
STÄFFE BRÄU heisst dä Gärstesaft!



Auftritt Stäffe mit „Bier her, Bier her...“



Stäffe:
Es Glas STÄFFE BRÄU vor dem Tanz
hebt die Stimmung und den...

Cali:
Soo, du Grüsel!

Stäffe:
Was hesch au?
Das isch de neusti Hit – vom Patrick Nuo.

Cali:
Aber süess isch er, de Nuo,
so süess wie mini Nussgipfel.

Stäffe:
Und scharf wie Paprika.

Cali:
Dä müesst halt ändlich en richtigi Frau ha,
dä Härzchäfer.

Stäffe:
S Francine Jordi wär wieder frei:
Die hett jo en hormonelle Hunger-Ast.

Cali:
Oder s Vreni Schneider...

Beide:
En Porno am Pisterand
Im schöne Glarnerland
Im grüene Vreni-Gwand
Chumm gimmer dini Hand.
Eeeeen Porno am Pisterand...

Cali:
D Schwiizer Schi-Nati mögt ämu
e chli sprützige Nochwuchs durchus verliide.

Stäffe:
Aber wie würde denn die arme Chindali heisse
nochem neue Namensrächt:
Nuo oder Schneider?
Nuo Schneider oder Schneider Nuo?

Cali:
Hauptsach ned Schneider-Ammann.

Stäffe:
Au nei, wenn dä würd Schi fahre wie'n er redt:
Das gäb ei Ifädler nochem andere!

Cali:
So, fertig jetzt. Was muesch ha?

Stäffe:
I hätt gärn es Bretzel – und es Päärli Wiisswürscht.

Cali:
Aktion wäre grad Wienerli im Nussgipfel.
Und d'Löcher vo de Willisauer Ringli
hemmer hött mit Chalbs-Brät gstopft.

Stäffe:
Chom hör mer uf.
Das Ichaufe isch afig kompliziert gnueg z Willisau.
Bald muess i dänk mis Bier i de Drogerie verchaufe.

Cali:
No besser uf de Post: Bier fählt no
im Sortimänt vo dem Gmischtwarehändler.

Beide:
Bier her, Bier her
So ne Bier-Idee
Bier her, Bier her
Au, das tued üs weh!

Stäffe:
Du würdisch i dim Bäckerlade besser mis Bier verchaufe
als Cervelat und Schwartemage.

Cali:
Eventuell chönnt ich mit dim STÄFFE BRÄU
mis Angebot tatsächlich wiiter diversifiziere.

Stäffe:
Jo, zum Biespiel mit Dagmersellerli im Bierteig!

Cali:
Was choschtet eigentlich so ne Fläsche vo dim Bier?

Stäffe:
Es Zähnernötli, wöu's du bisch.

Cali:
Es Zähnernötli? Bisch wahnsinnig?
Du Abzocker!

Stäffe:
Pass uf, was d'seisch: Ich heisse ned Blocher.

Cali:
Aber nei, de Christoph isch doch kei Abzocker.

Stäffe:
Warum isch er denn gäge die Initiative, he?

Cali:
Äbe weil er gäge d'Abzocker isch,
hett er ämu gseit i de Fästhalle hinde.

Stäffe:
Aber de müesst er jo deför si.

Cali:
Nei, äbe ned:
Wenn'd deför bisch, muesch degäge si,
seit de Blocher.
Und de Seppi ned Minder.

Stäffe:
Aber das isch denn en Abzocker!
Ha ghört, de Schaller Seppi chöm
für jede Läserbrief 100 Franke über.
Usem Böttu-Jubiläumsfonds
für unfreiwillige Humor.

Cali:
Immerhin hett de Seppi jetzt Konkurränz übercho:
De Steiner Kasi schriibt fascht no
die schöneri Proletarier-Poesie.

Stäffe:
Aber de Seppi darf künftig nömme schriibe im Böttu.
Er isch überfüehrt worde.

Cali:
Säg au. Was hett er denn verbroche?

Stäffe:
De Seppi isch i de Doping-Kontrolle hange blebe.

Cali:
Jää, hett er öppe Epo gnoh vorem Schriibe?

Stäffe:
Nei, en Harasse STÄFFE BRÄU!

Beide:
Bier her, Bier her
So ne Bier-Idee
Bier her, Bier her
Au, das tued üs weh!

Cali:
Wohi lieferisch denn überall dis Bier?

Stäffe:
Bi mir sind alli Chunde willkomme – usser de Kanton:
Dä hed kei Müüs.

Cali:
Dunkt mi, wo's doch i de Büros vo de Regierigsröt
nur so wimmlet vor Müüs und Ratte.
Enzig üse Chüng Röbi isch verschont blibe vor dere Ploog.

Stäffe:
Wie hett er denn das gschafft?

Cali:
Ganz eifach: Er hett en Parteifründin mitgno is Büro –
es Büsi!

Stäffe:
Aber für d'Archälolo-Archäloho-Archäologogo-
also für die Achilogoge-Areochio, dingsdo:
für die staatlich besoldete Wüehlmüüs
hend's ämu kei Gäld ka.

Cali:
Jo, jetzt wärded mir nie erfahre,
was genau sich under üsem Chileplatz für Gheimnis verbärge.

Stäffe:
Das isch jo klar. Für das bruchsch keini settigi
Archä-Archilo-Archäliologe do.

Cali:
Jäää, was liit denn underem Chileplatz, waseliwas?

Stäffe:
Ganz eifach:
96 Generatione Kreiliger!

Beide:
Bier her, Bier her
So ne Bier-Idee
Bier her, Bier her
Au, das tued üs weh!

Cali:
Jo, jetzt gohts denn ändlich los
mit dere Gasse-Sanierig im Städtli.

Stäffe:
Das macht mer e chli Angst.

Cali:
Aber au, wieso?

Stäffe:
I dem neue Städtli find ich sicher de Heiwäg nümme.
Channsch di niene meh orientiere: Es hett jo keis Trottoir meh!

Cali:
Aber üses Städtli wird zumene einzige grosse Platz:
zumene riesige Parkplatz – judihui, do lacht mis Chrämerhärz!

Stäffe:
Jo, jo, aber ohni die schöne Trottoir
sinkt s Niveau im Städtli eifach no chli tüüfer.

Cali:
So, du Näschtbeschmutzer. Wotsch dänk dis Bier au no
a de Ettiswilerstross unde verchaufe.

Stäffe:
Jo, mis STÄFFE BRÄU rouge
gitts exklusiv im neue Sport Rock.

Cali:
Jo, Platz für es paar Geschäft hättis jo no i dere Puma-Arena.
Aber säg: Worum STÄFFE BRÄU rouge?

Stäffe:
Mir plane im hindere Teil so nes Etablissement, verstosch.

Cali:
Iii-aaa: Und dänk alles mit Hüsler-Näscht!

Beide:
Bier her, Bier her
So ne Bier-Idee
Bier her, Bier her
Au, das tued üs weh!

Stäffe:
Jä, irgendwo äne muess ich jo mis Bier liefere,
wenn bald alli Beize zue göhnd.

Cali:
Säg au, das Pööm, Pöem, Poöm oder wie das heisst...

Stäffe:
Isch egal: das Pömm gitts au bald nömm.

Cali:
Das stört mi ned. Det hani sowieso Lokalverbot.

Stäffe:
Isch ned so schlimm:
Z Soorsi äne rüered si sogar Stadtrötinne us de Beiz.

Cali:
Ich ha jo gar ned graucht im Poem.
Aber de Wirt het d'Fausto gmacht
und gseit, ich sig es Arschloch.

Stäffe:
Aha, drum träffed sich jetzt alli Arschlöcher
i de ANDERE Bar.

Cali:
Aber die arme Cheibe müend die ganz Ziit stoh.
De Poem-Wirt hett ne d'Stüehl
underem Födle wäg zoge.

Stäffe:
Vo ganz Willisau dörfed genau no 14 Persone das Poem beträte.

Cali:
Und jede Tag gheit eine use.
Chasch usrächne: I zwe Woche isch dä Lade zue!

Stäffe:
Und wo söll ich künftig mis Fürobe-Bier trinke?

Cali:
Kei Angst, de Fausto hett scho en neue Pächter.
En Landsmaa: en Herr Lusconi oder so ähnlich.

Stäffe:
Bingo! Bingo!

Cali:
Nei: Bunga-Bunga!

Stäffe:
De Kredit für dä Deal bläched schiins d'UBS.

Cali:
Das au no. Die Abzocker sölled ändlich
das S striiche us ihrem Name.
Muesch di jo schäme, als ehrliche Schwiizer.
Fertig UBS, nur no UB.

Stäffe:
Was änderets: Gauner bliibt Gauner.

Cali:
Aber offebar hett de UB, dä Ufhuser Bueb,
immer no gnueg Chies für Investitione.

Stäffe:
Er spändi schiins de Gmeind Ufhuse es neus Füürwehrlokal.

Cali:
Und wenn alles nümi hilft
chann er immer no z'Fischbach obe en Asyl-Aatrag stelle!

Beide:
Bier her, Bier her
So ne Bier-Idee
Bier her, Bier her
Au, das tued üs weh!

Stäffe:
So, Mägi, gib mer ändlich mis Brezel und die Würscht.
Ich muss no go STAFFE BRÄU liefere
uf die neui Grossbaustell
ufem ehemalige Landi-Areal.

Cali:
Aha, i dem neue Willisauer Immobilie-König, im Pilag.
Das isch jo en Art moderne Meyer Geni.
Keis Wunder: Er wohnt ja au
i de ehemalige Bank vom Geni sälig.

Stäffe:
Jo, jo, dä Pilag ramisiert alles zäme:
Tübali, Manor, Landi...

Cali:
Als nächsts chauft dä dänk au no de Schlüssel alias Chang Cheng.
Aber üse Leue: dä vemag er ned.

Stäffe:
Chasch au dänke.
De Bärti wär froh, er wär die Hypothek los.

Cali:
Mag si. Aber er söll sich ned z'früeh freue:
S Hildi bringt niemmer läbig us dem Leue!
Stäffe:
Übrigens: Was heisst eigentlich Pilag?

Cali:
Ganz eifach:
PIus Lused Alli Gebäude ab!

Stäffe:
So, jetzt muess i wiiter.
D'Kanöffelzunft hett au no es Fässli STÄFFE BRÄU bstellt.
Für's Abschiedsfäscht vom Zunftmeister Paprika.

Cali:
Säg ihm de, dass ich s Brot chönnt liefere.
Und bi Bedarf au en Ochs am Spiess.
Das cha mer jo chum no steigere.
Usser de nächst Zunftmeister wär en Hornochs.

Stäffe:
Nimm das sofort zrogg, Mägi!
Nimm das sofort zrogg!
De nächst Zunftmeister isch en ganz famose Maa.
Lueg mi doch emol richtig aa!

Cali:
Ahaaa, so isch das.
Ha gmeint, es wär de Weibel Beck.

Beide:
Bier her, Bier her
So ne Bier-Idee
Bier her, Bier her
Au, das tued üs weh!

Stäffe:
Nüd, gäge d'Zunft, gäll.
Mir hend schliesslich de Kulturpriis gwonne.

Cali:
Kultur, Kultur.
Die würded lieber emol Lüüt uszeichne, wo chönd schaffe.

Stäffe:
Rächt hesch, Mägi:
Ich gwönne de diamantigi Zapfhahne
und du die goldigi Birewegge.

Cali:
Die nächste Kulturpriisträger heisse...

Stäffe:
...Cali...

Cali:
...und Stäffe!

Stäffe:
Cali!

Cali:
Stäffe!

Stäffe:
Cali!

Cali:
Stäffe!

usw.