TATORT WILLISAU
CALI & STÄFFE 2012
Cali: Gestatten: Cali, Kommissar
Im Schwiizer Färnseh bald en Star
Chom muetig a die Casting-Show
Is Hinterland, uf Willisau.
D'Lozärner hend sich schön blamiert
Weil d'Safran-Zunft sich vornähm ziert
Sogar de Stapi indigniert
Hett übers d Dräibuch sich mockiert.
Die Städter mached so nes Gstörm
Die Huerenaffe hend doch Wörm.
Hend gmeint dä „Tatort“ sig en Gspass
So harmlos wie de Samstig-Jass.
Jetzt dräiet mir halt z Willisau
Kulisse hend mir schöni au
Statt d'Safran-Buebe spiele mit:
D'Karnöffler – läck, das wird en Hit!
De Gubser und sis Top-Modell
Die wärdid abgsetzt uf de Stell
Drum übernämed jetzt dä Fall:
De Cali und de Stäffe – wow!
So, das Värsli hani suber brocht. Aber ich bin offesichtlich de Einzig, wo im Ufruef vom Schwiizer Färnseh gfolget isch. Die sueched jo ganz verzwiiflet noch Schauspielerinne und Schauspieler z Willisau, domit dä „Tatort“ doch noch z'Stand chond. Also: Als Kommissar bin ich gsetzt, jetzt bruched mir als nächsts e schöni Liich.
Auftritt Stäffe (Musik: Tatort-Melodie)
Cali: Machsch die guet, Stäffe, so als Liich.
Stäffe: Ich be tot – ich säge nüd!
Cali: Super, denn hemmer ändlich emol en glungene Uftritt, wenn du ned ständig dri schnorrisch.
Stäffe: Ich be tot – ich säge nüd!
Cali: Aber wo sind denn die rästliche Zünftler? Z'Zweite chöne mir jo kei Film dräie.
Stäffe: Ich be tot – ich säge nüd!
Cali: So, hör jetzt uf mit dem Seich – chasch mi ned au no im Stich lo wie die andere Karnöffler. Wenigstens de Zunftmeister hätti chönne cho.
Stäffe: Dä wirblet sicher wieder irgendwo ume. Er isch im Härz halt immer no en Änzilochmaa.
Cali: Wohär nimmt dä bloss die Energie?
Stäffe: De Päuli setzt konsequänt uf Alternativenergie:
Er hett es sonnigs Gmüet...
Cali: ... er macht viel Wind...
Stäffe: ... und er redt wie ne Wasserfall!
Cali: Wenn d'Karnöffler ned wend mitmache, müemer dä „Tatort“ halt uf Däiu verlegge und mit de Güggalizunft zämeschaffe.
Stäffe: E Krimi vo Däiu – das isch viel z'eifach und de Fall noch 10 Minute glöst.
Cali: Wieso meinsch?
Stäffe: Det isch de Mörder zu 90 Prozänt en Aregger!
Cali: Aber au z Willisau isch es ned ganz eifach, es realistisches Dräibuech für ne Krimi z schriibe. Do isch jo sitem Mässerwurf vom Ueli Schröter bim Heilig Bluet nömme viel passiert.
Stäffe: Die Story müessti vielleicht i de Banke-Szene spiele: so ne Schwarzgäld-Affäre wär doch aktuell.
Cali: En Stüürhinterzieher, wo sini Chöle bi Nacht und Näbu miteme Wegelin zu de Raiffeisen transportiert.
Stäffe: D'Kantonalbank sig auch ned ganz suber, hani ghört. Es duuri so lang mit dem Neubau, weil sie im alte Gebäude no vieli Liiche im Chäller gfunde heige.
Cali: Settigi Sorge han ich ned, gottseidank: Ich werde nämlich pauschal besteuert.
Stäffe: Jo, jo: Pauschal bescheuert!
Cali: D'Banke müessted halt ändlich die Wiissgäld-Strategie umsetze.
Stäffe: Do muess mer d'Valiant-Bank lobe. Die het das vor Johre scho erkannt.
Cali: Genau: De Bättig Willy gilt jo als Erfinder vo de sogenannte Wiisswii-Strategie!
Stäffe: Dä Krimi chönnt au im politische Milieu spiele: „Mord im Wahlkampf“ – oder so.
Cali: Aber hüür sind nur Gmeindrotswahle, do lauft jo nüd z Willisau. Usnahmswiis kandidiert ned emol s Büsi-Hildi.
Stäffe: Logo, bi üs getts jo immer nur stilli Wahle – das passt ned zum Hildi!
Cali: Jo, si het momentan e chlini Pächsträhne, üses Büsi – au brueflich.
Stäffe: Wieso? Laufts ned mit de Reinigung?
Cali: Momou, aber sie het halt ghofft, sie wärdi Diräktorin vo dem abverheite Chatze-Museum bim Möbel Stöckli.
Stäffe: Deför hett s Hildi jetzt im Äntlibuech hinde e Schnaps-Brönnerei eröffnet.
Cali: Aber ihri ersti hochprozäntigi Eigekreation
isch leider i d'Hose: de Hilde-Brand.
Stäffe: Macht nüd, mir hend jo no üses Alkohol-Fachgschäft mit dem schöne neue Name „Fasszination“.
Cali: Jo, bi dem Lade muesch wirklich z'erscht es Fass Wii trunke haa, bis de richtig Ii- und Usgang findsch bim Chreisel.
Stäffe: Jo, jo, a de Ettiswilerstross dräisch di ständig im Chreis ufem Wäg vo Ichaufs-Center zu Ichaufs-Center.
Cali: Migros-Center
Stäffe: Coop-Center
Cali: Jumbo-Center
Stäffe: Aldi-Center
Cali: Lidl-Center
Stäffe: Landi-Center
Cali: Bächli-Center
Stäffe: Asyl-Center
Cali: Halt, halt – das isch z Fischbach.
Stäffe: Das gäb sicher au viel Stoff für ne Krimi.
Cali: Jo, i de Postauto i dere Gägend heigis neustens massiv meh Schwarzfahrer.
Stäffe: Mer isch höttzutag au i de chline Käffer uf de Landschaft nömme sicher.
Cali: Säg au: Hergiswil zum Biespiel isch jo neuerdings en richtigi Droge-Höll!
Stäffe: Äh, das wird doch nume vo de Medie ufe sterilisiert.
Cali: Jo, jo, vo dere Wältwoche und so.
Stäffe: Übrigens: Könnsch de Unterschied zwösche de Wältwoche und em Böttu?
Cali: Äh, nei.
Stäffe: Über d'Wältwoche muesch di nur einisch ufrege i de Woche!
Cali: Stimmt: D'Wältwoche hett nur ein Köppel, aber de Böttu de Schaller Seppi und de Iseschmid.
Stäffe: Gottseidank hemmer no üsi SVP:
Die stoht no zu üsne Schwiizer Wärt.
Cali: Die luege zu üsne Arbeitsplätz
und verteidige üsi Freiheit.
Stäffe: Frey wie de Ruedi: Dä hett Biss und zeigt sine Gägner öppe emol d'Zähnd
Cali: Im Ruedi sini neue Zähnd hend bloss en chline Schönheitsfähler: Made in Thailand...!
Stäffe: Dä isch überhaupt viel im Usland, dä Ruedi.
Cali: Jo, d'Regierigsrotsfiir vom Küng Robi hett er verpasst, weil er schiins z Schottland im Stau gstande sig.
Stäffe: Isch doch nur en fuuli Usred gseh: Dä Ruedi isch doch im Schottische ned z'Schlag cho mit dem Links-Verchehr!
Cali:Üse „Tatort“ chönnti au i dem neue Sport- und Vergnüegigspalast vom Sport-Rock-Café spiele. Die planed jo en Riesesach zur Eröffnig: En Swinger-Party..., äh Ringer-Party.
Stäffe: Ich finde, dä Krimi muess sich im Städtli abspiele – wäg de schöne Kulisse.
Cali: De müemmer aber prässiere, bevor sie mit dere Gassesanierig afönd.
Stäffe: Jo, das isch en Skandal: die Architekte chlaued üs nämlich mindestens anderthalb Parkplätz.
Cali: Parkplatz-Mörder!
Stäffe: Eis isch klar: Mir bruche no me Personal – mir zwe allei chönd jo ned uf Verbrächerjagd.
Cali: Mindestens en Assistäntin müesste mer no ha – zum Biespiel s Schwägler Mägi. Ihre Köter chönnte mer sogar no als Polizeihund isetze.
Stäffe: Das chonnt ned guet. Die hett das Viech überhaupt ned im Griff. Wo sie s letzt Mol isch go ichaufe, hett s Mägi das Tierli schön brav dosse vorem Lade abunde, bis sie ihri Kommissione erledigt het.
Cali: Das isch doch vorbildlich.
Stäffe: Scho, aber am Obe hett d'Verchäuferin im Mägi aglüüte und gfrogt, öb sie das arme Hundali ned ändlich wetti go heihole.
Cali: Mir bruuchte sowieso en tifigere Polizeihund, am beste en düütsche Schäfer.
Stäffe: Ich wüsst grad eine, wo no freii Kapazität hätti.
Cali: Wär?
Stäffe: Wulff, Wulff, Wulff...!
Cali: E guete Grichtsmediziner müemmer au no ha. Ich glaube, mir stelle de Dokter Krummenacher a.
Stäffe: Do hend aber die Liiche Glück, dass sie scho tot sind.
Cali: Und wär näme mer für d'Spuuresicherig?
Stäffe: Das isch e brotlose Job z Willisau. De Schoggi tued mit sim neue Laubbläser vorewäg alli Spure verwösche.
Beide: Bäääh, bäääh, bäääh....
Cali: Noch de Chilbi....
Beide: Bäääh, bäääh, bäääh....
Stäffe: Nochem Christkindlimärt...
Beide: Bäääh, bäääh, bäääh....
Cali: Noch de Städlifasnacht....
Beide: Bäääh, bäääh, bäääh....
Stäffe: Und immer wieder am Morge am Föifi...
Beide: Bäääh, bäääh, bäääh....
Cali: Wieviel Gäld hemmer eigentlich zur Verfüegig für dä Krimi?
Stäffe: No nüd – mer hend keis Budget.
Cali: Wie de Kanton. Die hend kei Chöle meh, sit de Küng Robi d'Rächnige für sine Lastwage-Wahlkampf zahlt het.
Stäffe: Wenigstens hemmer d'Film-Musig scho: Die „Tatort“-Melodie isch jo unstärblich.
Cali: S mögt emol öppis Neus verliide: „Spiel mir das Lied vom Tod“ oder so.
Stäffe: Intonisiert vom Willisauer Scharfschütze-Orchester.
Cali: Was isch denn das für ne Formation?
Stäffe: Die jungi Fäldmusig – die hend grad ihre Dirigänt abgschosse!
Cali: Hends scho en neue?
Stäffe: Jo, de Pfarrer Martin.
Cali: Super, de gitts a de nächste Narremäss wieder meh Musig statt drei Predigte.
Stäffe: Aber es Dräibuech für üse Krimi hemmer immer no ned.
Cali: Vielleicht müesst mer s Frölein Da Capo froge, die hett jo jetzt Erfahrig im Film-Business.
Stäffe: S Frölein wär aber au e schöni Liich.
Cali: S gieng churz und schmärzlos: Mir müesst ihre nur de Stecker usezieh.
Stäffe: Oder doch lieber e Mord i de Fuessball-Szene?
Cali: Jo, irgend so ne tschtschenische Mafioso, wo de Künzli Willy um sis 100-Johr-Jubiläum als FC-Präsident bringt.
Stäffe: Nenei, d Hinterländer Fuessball-Vereine bruche keini frömdi Investore.
Cali: Richtig, mir hend eine, wo Chies het wie de Tschagajew und Erfahrig im Pozässiere wie de Constantin.
Stäffe: Und sit s Willisauer Amtsgfängnis gschlosse isch, chann er au wieder ruhig pfuuse...
Cali: ...z Ufhuuse.
Stäffe: Immer no kei Karnöffler do.
Cali: Mir sind tatsächlich uf üs allei gstellt bi dere Verbrächerjagd.
Stäffe: Do hilft nur no üsi Intuition.
Cali: Oder es Medium. – Genau: Du bisch jo eigentlich tot, Stäffe. Und ich cha jetzt mit dir Kontakt ufnäh im Jensits.
Stäffe: Okay, ich bi jetzt ganz fest tot.
Cali: Chline Stäffe, grosse Stäffe
Säg üs, wärs als Nächsts wird träffe:
Weles Opfer muess dra glaube?
Wele Lade tüends usraube?
Stäffe: Ich gsehnes, ich gsehnes, es isch ned schwär:
De Manor, de Manor, dä isch ganz läär!
Cali: Dä isch jo scho lang zue, du Löu! Chomm, mir mache no ne Versuech.
Chline Stäffe, grosse Stäffe
Säg üs, wärs als Nächsts wird träffe:
Weles Gschäft löhnd d'Chunde hange
Muess ums Überläbe bange?
Stäffe: De Aldi, de Aldi, es isch ned schwär:
Dä riesigi Parkplatz, dä isch ganz läär.
Cali: Scho besser. Und jetzt grad nonemol!
Chline Stäffe, grosse Stäffe
Säg üs, wärs als Nächsts wird träffe:
Weli Beiz muess d'Türe schliesse?
Wo channsch keini Bier meh gniesse?
Stäffe: De Leue, de Leue, doch ohni Gewähr:
So lang mer zwe läbe, bliibt dä niemols läär!
Totgesagte leben länger: Ich wott jetzt nömme tot si, sondern eis go zieh. – Los, wiiter gohts!
Cali: Genau. Lömmer dä „Tatort „. Dä hett jo kei grossi Tradition, dä getts erst sit guet 40 Johr. De Cali und de Stäffe aber scho sit 100 Johr!
Stäffe: 50 Johr Cali...
Cali: ...und bald 50 Johr Stäffe!
Stäffe: Cali
Cali: Stäffe
Stäffe: Cali
Cali: Stäffe
Stäffe: Cali
Cali: Stäffe
Stäffe: Cali
Cali: Stäffe usw.
|