WIXPO '03
Filmausschnitte von der Fasnacht: (Die Ausschnitte sind
im Real Player-Format und müssen zuerst heruntergeladen werden um sie ansehen
zu können)
Ausschnitt 1
Ausschnitt 2 Ausschnitt 3
Cali eilt im Stechschritt auf die Bühne, schaut einige
Male nervös auf die Uhr und fragt sich, wo Stäffe bleibt.
Cali: Wo bliibt nome dä Luftibus vomene Grafiker und
Hobby-Dichter. Oh, mer hett öppis, wemmer mit so Künstler muess zäme schaffe! I
mim Metier chasch ohni Pünktlichkeit und Disziplin grad zämepacke.
So, es isch Ziit, mer föhnd aa, basta! Mini Dame und Herre,
es freut mich, dass sie so zahlriich zu dem höttige Orientierigsobe erschiene sind.
Zäme mit mim Compagnon, em Lifestyle-Guru Brûné W. Stäffe vom Atelier "West just
the best" wird ich ihne hött Obe s Willisauer Jubiläums-Konzept WIXPO.03 vorstelle.
Gestatte Sie z'erscht es paar Wort zu miner Person: Min Name isch
C.A. Livers. Ich bin CEC - Chief Event Consulter vom wältwiit füehrende Kommunikations-
und Marketingunternähme Cash and Crash - ihr Partner für Event-Management, Business,
Wellness and Happyness.
Effiziänz isch üses oberste Prinzip, dezue ghört au Pünktlichkeit,
Herr Stäffe!
Stäffe zieht gemächlichen Schrittes, philosophierend und in
Selbstgespräche verloren die Bühne.
Cali: Do bisch jo ändlich, ich ha scho aagfange, mir
sind zmitzt drin, los, stiig ii, vorstelle chasch di es anders Mol.
Stäffe: Scho guet, ich säge mir immer: Wer sich zuerst
vorstellen muss ist eine unbekannte Nuss.
Cali: Üses Unternähme, mini Dame und Herre, schaffed
sträng nochem Prinzip -iere.
Stäffe: analysiere
Cali: investiere
Stäffe: minimiere
Cali: optimiere
Stäffe: kritisiere
Cali: korrigiere
Stäffe: importiere
Cali: exportiere
Stäffe: rationalisiere
Cali: diversifiziere
Stäffe: dereguliere
Cali: umstrukturiere
Stäffe: fusioniere
Cali: kommandiere
Stäffe: dörestiere
Beide: und abkassiere
Cali: Jo, ganz gratis isch üse kreativi Dänkprozess
natürli ned.
Stäffe: Mir hend üs vo de beide Willisauer Gmeinde e
chline Biitrag vo zwölfehalb Millione Franke lo uszahle - als Cortison quasi, äh
als Provision.
Cali: Wäge dem hend d Städtler jetzt leider kei Gäld
meh - s'isch zom hüüle - för die schöne alte Bronnesüüle.
Stäffe: Die chauft jetzt d Gmeind Willisau-Land - als
Gröndigs- Gschänk för d Chäppalimatt- Zunft.
Cali: Jä, wotsch jetzt wirklich Zunftmeister wärde det
hinde?
Stäffe: Bi de Karnöffle hani jo ned dörfe, bi dene Ginöffle.
Cali: Und wie träted ihr denn uf mit dere Chäppalimatt-Zunft?
Stäffe: Das isch no gheim. Aber eis chani euch säge:
Mer chöme de ned als Hüehner!
Cali: Zrogg jetzt zum Gschäft: Bimene allfällige Grounding
vo üsem Projekt wäre mir sälbstverständlich bereit, en agmässene Teil vo dene 12,5
Millione Franke zrogg z'erstatte.
Stäffe: Öppe je 10 000 Franke pro Gmeind, hemmer dänkt.
Cali: Jetzt aber zur Sach: Nochdem im Wegere-Blick
gross gstande isch, dass d Willisauer überhaupt kei Idee hend, isch im bäbstliche
Komitee vo de 700-Johr- Fiir Panik usbroche ond wöu de OK- Präsident Egon die heikle
Ufgabe gärn delegiert, hett er üs beuftreit, es griffigs und innovativs Jubiläums-Konzept
us z'arbeite.
Stäffe: Immerhe, es paar Idee hend d Willisauer jo bimene
Wettbewerb zäme brocht. Zom Biispiel es Büecherhuus im höttige Sigristehuus vom
Heilig Bluet.
Cali: Es Büecherhuus? Bisch wahnsinnig? Stell dir vor,
das wär jo es Schlaraffeland för de Zivilschutz- General Blinz und sini Schredder-Grenadier.
Stäffe: Nochem Motto: Der Schredder stets in voller
Fahrt: Kulturgüterschutz nach Willisauer Art.
Cali: Jo, jo, die Elitetruppe hett jetzt au en nöie
Name öbercho: Tatkräftige Literatur-Banausen. Churz: Ta-Li-Ban!
Aber chöme mer jetzt zu üsere Wixpo.03. Wichtig isch, dass dä
Gross-Alass au guet vermarktet wird miteme prefessionelle Tourismus-Konzept.
Mir hend do meh oder weniger bi Null müesse aafo.
Stäffe: Jo, wär meint mitem Christkindli- Märt elei
sigs to, dä gloubt no a Osterhaas.
Cali: Einzige strukturelle Stützpunkt isch jo hött das
so genannte Verchehrsbüro bim Bahnhof.
Stäffe: Dodevo chan ich es Liedli singe. Woni s letzschtmol
ha wölle s Billet mitem EC-Chärtli zahle, seit mer dä Bähnler hinterem Schalter,
si akzeptiere kei Kumulus-Charte und gäbe au kei Rabattmärkli.
Cali: So goths ned. Mini Dame und Herre, mir konzipiere
drum s Willisauer Jubiläumsjohr als nahtlosi Fortsetzig vo de Expo.02!
Stäffe: Ned nor z Murte ond am Bielersee Söll mer
exponierti Baute gseh. Willisauer Börger, löpfed eues Arsch Mer boue im Ostergau
en Arteplasch!
Cali: Vom Ostergau här füehrt en Erläbnis-Parcours -
en so genannte Event-Highway - is Städtli.
Stäffe: Erschti Station isch de Goldwäscher-Chreisu
bim Galge- Chäppeli.
Cali: Det hett mer en Usstelligs-Tämpu baued i de Dimensione
vom Petersdom. D Arbeiter hend ganz schön müesse loche.
Stäffe: Nochem Motto: Je grösser das Bauwerk desto
ober-tüfer der Aushub!
Cali: Wiiter jetzt aber mitem WIXPO- Konzept. S'Härzstöck
vo dem Top- Event findet natürli im Städtli statt. D Bondesrötin Metzler hett de
Fäschtplatz im Sommer persönlich inspiziert und für tauglich befonde.
Stäffe: Onder üs gseit: Mer hend natürli dä Entscheid
ganz sanft beiflosst.
Cali: Aber ned, wie sie jetzt meine: De Sigrist im Städtli
hett ned öppe chönne omboue, wöu mir so viel Pöuzmäntu of Bärn ufe gschickt hättid.
Stäffe: Nenei, mer hend im Ruthli ganz eifach in aller
Öffentlichkeit de Marsch bloose.
Cali: D Fäldmusig Willisau-Land hett die Sinfonie dörfe
intoniere - und das uf findlichem Territorium zmitzt i de Stadt.
Stäffe: Das hett die Städtler schön gwormet. Drom hend
sie d Stühl für d Fäldmuser mitem Rögge zom Publikum ufgstellt, so dass sie ihre
Metzler-Marsch hätte müesse a d Rothuus-Muure äne bloose.
Cali: S isch halt es ewigs Politikum. Mir grauts scho
vor de Entscheidig, vo welere Farb de Fästredner a üsere WIXPO.03 muess si: rot
oder schwarz.
Stäffe: Weder, noch! Mir nämed eine vo dere neue SVP.
Die rede klar und düütlich und verstöhnds meisterhaft, mit vielne Wort nüd z'säge.
Cali: Und das alles ganz frey!
Stäffe: Als nächsts müessted mer no es paar Wort zu
de Unterkunft vo dene viele WIXPO.03-Bsuecher säge, wo wärdid uf Willisau cho.
Cali: Keis Problem, das isch doch d i e Chance, ändlich
das Hotel uf de Gulp obe z baue.
Stäffe: Das goht leider nömme, das Areal hett bereits
de Schumi kauft. Inklusive Helikopter-Landeplatz i de Lothar-Schneise vom Gulpwald.
Cali: So? De Schumi? Jetzt hani gmeint z Willisau zahl
mer viel z viel Stüüre. Ich hätt dänkt, dä Schumi wörd ines günstigers Gebiet
go wohne. Zom Biespiel uf Affoltere.
Stäffe: Du meinsch Affoltere am Alice - äh am Albis?
Cali: Nei, Affoltere am Vierwaldstättersee.
Stäffe: Aber äbe: Üses Unterkunftsproblem hemmer no
ned glöst.
Cali: Denn stelle mer halt es paar Appartment-Hüüser
ufem Gütsch obe uf, dem neue In-Quartier of de Sonnsiite vo Willisau.
Stäffe: Jäääää, das isch aber geologisch heikel uf dem
Gütsch, wär weiss, wie lang dä Hang no hebet.
Cali: Domme Seich, de Landamme Wändu isch ämu au det
ufe zöglet und bes hött...
Stäffe: Jääää, das cha schnöu go: Heute noch im Gütsch
Morgen schon im Rütsch!
Cali: Also, wiiter gohts. S'Verpflegigs- Problem vo
de WIXPO.03 müemmer au no i Griff öbercho.
Stäffe: Jo, das bruucht Tuusigi vo Wörscht jede Tag.
Cali: Das isch äbe grad üsi grössti Sorg: Z Willisau
getts bi Grossaläss jo so öppis wie nes Wurscht-Monopol im Städtli. Das isch es
heiligs Gsetz: s Christkindli persönlich hetts verordnet.
Stäffe: Nochem Motto: Es gibt, wenn unser Trixli
will Im ganzen Städtli nur einen Grill Willst du nicht bei Grüter kaufen
Musst du bis zur EPA laufen.
Cali: Pass uf met settige Spröch, söscht ghöremer de
s nächst Mol nömme zu dene userwählte Spröchli-Groppe, wo bim Trixli ond bim Willi
zunere Grillparty iiglade wärdid. Do muess ich no ne positive Wärbe-Sproch nocheschiebe.
Stäffe: Halt, ich wott au mit cho ässe.
Cali: Also, säge mers halt zäme:
Beide: Hesch du Honger oder Dorscht Biss ine saftigi
Grüter-Worscht! Proscht!
Cali: Aber ernsthaft: Wie löse mer das Verpflegigs-Problem?
Wär weiss, öb im Johr 2003 überhaupt no en Beiz offe het z Willisau.
Stäffe: De Möhre hett ämu wieder e schöni neui Fassade
übercho. Aber de Fredu ond s Rösli müesst mer halt au e chli uffrösche.
Cali: De Chrone-Püsse müess jetzt sogar stondewiis oswärts
als Taglöhner go schaffe. Jedefalls gsesch ne bald meh i de WelliS als i de heimische
Beiz.
Stäffe: Ond of ne nöie Löie chasch die no lang ned
fröie.
Cali: Deför wird im Schlossfäld obe de Chef schneller
usgwächsled als d Menücharte.
Stäffe: Aber die hend wenigstens en inovative Verwaltigsrot.
Am letzte Samstig send alli kostümiert zur Verwaltigsrotssitzig erschiene.
Cali: S'Problem isch nor: dä Alass wär gar ned als Verwaltigsrotssitzig
dänkt gseh, sondern als öffentliche Maskeball.
Stäffe: Also ich schlo vor, mir übergänd d Fäschtwirtschaft
vo de WIXPO.03 em Zunftmeister Büsi. Dem sini kulinarische Höheflög wärdid sogar
a de Basler Fasnacht zum Sujet:
Cali: Dr Büüsi als hechste Fasnachtsregänt Nimmt
s Kulinarische au a d Händ Pastetli mag är ned, stellt drum aigemächtig s'Menü
um.
Im Stärne goht er denn go bstelle Egal was Tradition tued welle
Zum Zmittag gitts Gratin, Gmies ond Roote Vor allem aber Zwäschtgebroote.
D Kollege hänn vom dem ghai Ahnig Sie groote ab dem Mohl in
Panigg: Zum Znacht händs bstellt - ghansch 3x roote - Scho weder Gratin ond
Zwätschgebroote.
Alle: Zwätschge, Zwätsche, Zwätschgebroote... Immer weder Zwätschgebroote.
Stäffe: Was fählt üs no zum Grosserfolg vo de WIXPO.03?
Cali: En guete Medie-Sponsor.
Stäffe: Richtig. Do setze mir uf Tele-Napf. I dem
sis Düütsch verstöhnd sogar üsi Mitbürger usem Balkan.
Cali: Apropos Sponsoring: Mir hend bereits en Vertrag
abgschlosse mit de Firma "Post Cheese".
Stäffe: Das isch de Hurschler Walti mitem gälbe Wägali.
Cali: E so ne Big-Event wie d WIXPO.03 hanget natürli
ganz entscheidend vomene seriöse Finanzierigs-Konzept ab.
Stäffe: Drum hemmer au en absoluti Kapazität als Finanzchef
verpflichtet: de hartnäckigsti Gäld-Itriiber vo Willisau
Cali: Und wär isch das?
Stäffe: De Breite-Hans.
Cali: Sali, hätsch mer dänk ned öppe e Füfliiber.
Stäffe: Dä Maa isch clever. Chörzlich hetter mi um 10
Franke abättlet. Do hani gfrogt, öb er lieber es Zähnernötli oder zwe Füfliiber
wett...
Cali: Lieber s Nötli - aber chasch mer de Mönz au gä!
Stäffe: De VIP-Apéro vo de WIXPO.03 findet öbrigens
im Pömm statt.
Cali: Wo bitte?
Stäffe: I dere neue Bar im Hirsche, im Pömm.
Cali: Das heisst Pööm, ned Pömm.
Stäffe: Öb Poem, Pööm oder Pömm Nochem zwöite Whisky
weisch es nömm!
Cali: Mini Dame und Herre, sowiit die wichtigste
Informatione zur Wixpo.03. Es liit a ihne, die einmaligi Chance z packe. Wenns glingt,
denn wärde sich die nächste Big-Events automatisch iistelle und de Name Willisau
endgültig uf de ganze Wält bekannt mache.
Stäffe: Jää, mit dem Name Willi-Sau wärde mer s international
schwär ha. Die Ändig Sau wirkt uf üsi Gäscht ned grad iiladend.
Cali: Und was schlosch du als global dänkende Lifestyle-Guru
vor?
Stäffe: Ich wörd nochem System Swissair vorgoh und statt
Willi-Sau eifach nur no Willi säge.
Cali: Hesch rächt, das verstoht mer uf de ganze Wält.
Stäffe: Säg nüd. S isch zwar no ned offiziell: Aber
Willisau - bzw. Willi - isch als Usträgigsort vom nächste G-8-Gipfel im Gspröch.
Cali: Jawoll, und d Stadtregierig hett die erste Sicherheitsuflage
bereits erfüllt und inere konzentrierte Nacht- und Näbelaktion bim Obertor Sofort-Massnahme
ergriffe.
Stäffe: Ond was söll das bringe?
Cali: Üse wiitsichtigi Stadtrot hett die gföhrliche
Pflasterstei entfärnt und dodemit die potenzielle Wurfgschoss vo de Globalisierigsgägner
früehziitig konfisziert.
Stäffe: Trotzdem: Vielleicht isch dä G-8- Gipfel doch
e Schuehnommere z gross für Willisau.
Cali: Guet, före Afang täts au en chlinere Aalass, s
mössted jo ned grad 8 sii.
Stäffe: E G-2-Gipfel wörd eigentlich gnüege.
Cali: Scho, aber weli 2 nämmer vo dene 8?
Stäffe: Jooooooo, zom Bispiel de Cali...
Cali: ...ond de Stäffe!
Stäffe: Cali!
Cali: Stäffe!
Stäffe: Cali!
Cali: Stäffe!
|