Unbenanntes Dokument
Jubiläums-Quiz
Cali & Stäffe 2003
HP. stellt Podium auf und lässt Quiz-Melodie laufen
Einzug Cali beim Refrain
Cali:
Guete Obe mini Dame und Herre. Es isch wieder sowiit: Güdismändig
hin oder här: Hött isch Quiz-Obe. Rötled Sie mit bi üsne
spannende Froge rund ums Gschehe in und um Willisau. Und wie i jedere Sändig
hemmer au hött en prominänte Gascht im Roteteam: Es isch das de Zunftmeister
vo de neu gröndete „Gärtlizunft Chäppalimatt“, de
Stäffe!
Einzug Stäffe mit Quiz-Refrain
Cali:
Jetzt isch es also doch no wohr worde mit de Chäppalimatt-Zunft.
Stäffe:
Das isch üse Biitrag zum Jubiläumsjohr. Ond im Gägesatz
zu dere Ginöffu-Zunft do im Städli vore länge mir au Hand a und
hege und pflege als Gartezwärge die schöne Jubiläumsgärtli
i de Chäppelimatt.
Cali: De hend ihr sicher viel z tue. Es wird
jo fliissig apflanzet i dene Gärtli.
Stäffe:
Jawoll, üsi schöni Chäppalimatt
blüeht richtig uf. Mir hend jo au beschti Zuekunftsussichte, zum neue Zentrum
vom vereinigte Willisau z wärde. Mer mache scho fliissig Tourismus-Wärbig:
Im Herzen von Land und Stadt:
Besuchen Sie die Chäppalimatt!
Cali:
Und för was hender das riesige Expo-Zält poschtet?
Stäffe: Das isch für s grosse Open-Air-Konzärt
im Sommer: „Out in de Green“ mitem Gartelaubechörli.
Cali:
Die Gärtlizunft hett also scho einigi inovativi Projekt
apackt.
Stäffe: Momou, är isch ämu zfriede mit üsere
Arbet.
dä Ewentmanaager do...
Cali: ...Ivänt-Mänätscher heisst das.
Stäffe: Jo velecht be euch vore...Also, är isch ämu
zfriede, de Meyer Beat – oder heisst dä be euch Meitscher Biit?
Cali:
Dodemit chömed mer ändlich zur erste Quiz-Frog:
Was ist ein Event-Manager?
a) ein Nagetier
b) ein Teenager mit grauen Haaren
c) ein Festorganisator nach dem Eventual-Prinzip (eventuell klappets, eventuell
ned...)
d) ein bäbstlich ernannter Kirchmeyer für die Jubiläumsliturgie
Stäffe: Ähhh......ääääääh......ehem...also...ääähhhh...
– Ich weiss‘ ned: Ich ha no kei Früehänglisch gha i de
Chäppalimatt hinde.
Cali:
Also, gömmer zur nächste Frog. Mer bliibe nochli
bim Jubiläumsjohr. Ergänzen Sie bitte den folgenden Satz:
Beim Info-Pavillon im schönen Lustgarten...
a) ...kannst du vor der Türe lange warten
b) ...die Erbauer mit Aesthetik nicht sparten
c) ...spielen die Senioren Karten bevor sie die Computer starten
d) ...könnte der Gang aufs WC zu einem Bad in der Enziwigger ausarten.
Stäffe: Dä Pavillon isch scho rächt. Nome schad,
dass mer ne ab em Sommer im Aargau unde muess go aluege, wenn ne d Wiggere mitem
erschte Gwitter wäggschwemmt hett.
Cali: Das ghört äbe zum geniale Konzept vo üsem
Eventmanager. Nochem Motto „Ein Pavillon geht um die Welt“ goht
üsi Willisauer Jubiläumsbotschaft ufem Flusswäg über Brugg,
Rheinfelden, Basel über Düütschland bis uf Rotterdam und schwimmt
denn wiiter uf de siebe Wältmeer. Das isch üse Willisauer Biitrag
zur Globalisierig!
Stäffe: Dumme Seich, die sölle z’erscht emol
Stadt und Land globalisiere.
Cali: Au das isch jo ufglöised. Und ihr Ländler wärded
mit eurem Gmeindshuus sogar Hauptsitz vo dem Willisau united.
Stäffe: Und was passiert de mit üsem schöne Rothuus?
Cali: Das füehrt üs zur nächste Quiz-Frog. Gitts
im Rothuus künftig:
a) noch de Gulp e zwöiti politischi Bau-Ruine
b) es Alterswohnheim, en Art es Stöckli für die überzählige
Stadt- und Landröt, Börgerröt, Schuelpfleger, Schuelleiter, Rächnigskommissions-
und Urnebüromitglieder, Füürwehrkommandante und Stüürbeamte.
c) en Willisauer Variante vom McDonalds: en McTrixli mitem exklusive Trixli-Burger
d) es Hotel City – im Sinn vonere Notschlofstell für die letzte Gäst
vom Restaurant City.
Stäffe: Alles falsch: S Rothuus wird zum Zunfthuus vo de
Gärtlizunft Chäppalimatt! – Aber das mitem Hotel City wär
au z überlegge. De City-Wirt hett jo en rächte Ufschwung noch dere
Johrhundert-Renovation.
Cali: Das isch s Stichwort zur nächste Frog: Was ist neu
seit dem Namenswechsel von der Bierhalle zum City?
a) de Baschi heisst jetzt Alois
b) statt Pommes frites getts french fries
c) bim Wustsalat muesch d Wurst sälber verschniide
d) d‘Stammgäscht liidet unter akuter Platzangst, wöu alli im
alte, ned renovierte Teil hinde wend hocke.
Stäffe: Alles Mumpitz! Die einzig Neuerig, won ich festgstellt
ha isch die: De Bierhalle-Täller heisst jetzt City-Täller .
Cali: Zrugg zu de Baute. Es glungnigs Bauwärk isch sicher
üsi renovierti Stadtmühle. Quiz-Frage: Wer hat diesen Umbau ermöglicht?
a) die Albert Koechlin Stiftung
b) die Adolf Stürmlin Stiftung
c) Albert Affolter Stiftung
d) die Adolf Bühler Bürgergemeinde Gedenkstiftung
Stäffe: D Bürgergmeind sicher ned, die muess zerscht
no ihri Pfrönd loswärde. Aber d Chilegmeind wott nüd bläche
deför.
Cali: Jo, jo, mit de Börgergmeind verlüremer scho
wieder en Institution.
Stäffe: Devör getts immer meh Parteie z Willisau.
Noch de SVP wotts jetzt au d SP wösse.
Cali: Jo die fahred ii mit jugendlichem Elan.
Stäffe: Nur bi de beide Präsidänte liit de Früehlig
au scho einigi Johr zrogg. Woni s Bild vo dene im Böttu gseh ha, hani mi
gfrogt: Heisst SP jetzt Seniore-Partei?
Cali: Das muesch du ned so äng gseh. Lueg d‘FDP a.
Die hend zwor en junge, dynamische Spitzekandidat, aber sis Gedankeguet isch
eher vo geschter und schmöckt scho ziemlich muffig.
Stäffe: Die andere hends au ned liecht. D‘CVP versuechds
jetzt uf sportlichi Art und heisst neu: Christliche Velo Partei.
Cali: Velo-Partei? Jä, hett jetzt öppe de Bühler
Dolf konvertiert und tued – us Ärger, wöu mer ihm d Börgergmeind
ewäggno hett – bi de CVP kandidiere?
Stäffe: Nenei, de Baureag-Franz isch de Kandidat vo de
Velo-Partei. Er hätt als OK-Chef bim GP Tell sini Spore abverdient. Es
hätt alles bestens klapped ussert dass am Sonntigmorge 200 Lüüt
vorem Möhresaal im Seich usse gstande sind. Debi weiss mers jo scho lang:
De fuuli Wirt vom Möhre
darfsch ned vorem Mittag störe!
Cali: Zrugg zu de Wahle. D‘SVP probierts zur Abwächslig
uf die sanfti Tour. Sie sägeds mit Blueme und göhnd miteme Röösli
uf Stimmefang.
Stäffe: Pass nume uf, bis die ihri Dorne usfahrt.
Cali: Lömmer das, die Junge wend sowieso nümi wösse
vo Politik. Die göhnd lieber i d Möscht – zum Biispiel i das
neui Sport-Rock-Café vom Schwingerkönig.
Stäffe: Dä hett sogar en Gross-Linwand, wo mer Sportaläss
cha luege.
Cali: Jojo, i dem Berich wird chräftig ufgrüschtet
bi de Williauer Beize. S Tübali und s City hend nochezoge und au sone Gross-Linwand
agschaffet.
Stäffe: Aber die attraktivsti Grosslinwand hett de Löie!
Cali: Was? Sit wenn?
Stäffe: Ganz eifach:
S Löie-Rita treit es wiises Gwand
Und fertig isch die Gross-Liinwand!
Cali: Apropos Liinwand: Jetzt hemmer jo weder so es neus Färnseh
z Willisau.
Stäffe: Jä meinsch üse Tele Napf. Dä wo
nie iiglade werd wenn öppis gohd z Willisau, dä arm Cheib.
Cali: Nenei, es gett en neue Kanal. Quizfrage: Wie heisst er?
a) Gernsehn
b) Gähnsehn
c) Garnichtsverstehn
d) Gernwiederaufstehn
Stäffe: Jä, du meinsch das meditative Fuessreflexzone-
Programm. Die wörde lieber emol e chli Action bringe oder zwöschedöre
en heisse Streife. Am beste live usem Tübali.
Cali: Usem Tübali?
Stäffe: Bim Polterobe vom jonge Grüter-Metzger hend
sini Kollege en Stripperin organisiert, wo ne ganz heissi Nomere abzoge hett.
Das hätt mer sölle filme!
Cali: Mer munklet zwor, d Bea Grüter heig sich bereits
d Exklusiv-Rächt vo dem Film gsicheret und wöig jetzt als Nochfolgerin
vo de Beate Uhse en neui Karriere starte.
Stäffe: Do chömmer üs jo freue uf de Grüter-Stand
am nächste Christkindli-Märt.
Cali: Wartemers ab was goht mit all dene Linwand- und Färnseh-Projekt
z Willisau. S isch ned so eifach i de Medie-Branche.
Stäffe: De Willisau Print verschwindt im Sprint.
Cali: Und de Böttu söll au nome no zwöimol i
de Woche usecho.
Stäffe: Das macht nüd, de muess ich mich nor no zwöimol
i de Woche ufrege über die furchtbare Elaborat vom Cali!
Cali: So jetzt müemmer aber wiiterfahre mit üsem Quiz.
Nächsti Frog: Wie heisst der Schulpflegepräsident von Willisau-Stadt?
Stäffe: Au, wele isch jetzt im Momänt grad Präsident?
Cali: Ich helf der e chli: Es isch en Dokter.
Stäffe: Jä, wele Dokter meinsch: Dä wo wirklich
Präsident isch oder dä wo seit wodöre?
Cali: So, do stell ich d Froge, ned du.
Stäffe: Heisst die Schuelpfleg eigentlich Schul-Pflege
wöu soviel Dökter debii sind?
Cali: Nei, es heisst Schul-Pflege, wöu d Willisauer Schuelbehörde
scho sit Johre en Pflege-Fall sind.
Stäffe: Das isch wie bi de Jäger: Hegen und pflegen
– und zwöschedöre wird öppe eine abgschosse.
Cali: Du seisch es. Was macht jetzt eigentlich de Blinz, wos
doch wäg dere Fusionitis immer weniger Ämtli gett?
Stäffe: Dä chönnt jo vielleicht au Ewent-Manager
wärde...
Cali: ...oder vollamtliche Bauverwalter i de Chilegass hinde,
dere architektonische Experimentier-Meile vo Willisau.
Stäffe: Zerscht hett d Korporation en Palast us Tropeholz
baued, denn de Grüter Edwin en Antrazit-Bunker und jetzt wennd schiins
d Karnöffle no es Zunfthuus baue. Wahrschinlich mitere vierfarbige Fassade
und eme überdimensionale Transparänt mit em Chopf vom Büsi Meier.
Und jedesmol wennd ueluegsch machts: Hihihihi....
Cali: Wiiter jetzt im Quiz. Bi de nächste Frog gohts um
de Christkindli-Märt: Wer verkauft am Willisauer Christkindli-Märt
die besten Würste? Mer hend au do vier Variante zur Uswahl:
a) die Metzgerei Grüter
b) die Metzgerei Grüter
c) die Metzgerei Grüter
d) die Metzgerei Grüter
Stäffe: Bi dere Frog nemi de Joker.
Cali: Wele wetti Sie gärn?
Stäffe: De Fifty-Fifty-Joker.
Cali: Guet, denn bliibe no zwe Variante.
a) die Metzgerei Grüter
b) die Metzgerei Grüter
Stäffe: Das isch z höch för mich. Bi üs
hinde ässe mir sowieso alli die neu vegetarischi Chäppalimatter Gärtliwurst
mit Gmües und Torbe-Füllig.
Cali: So, mir mönd wiiter. Die andere Beize warted au uf
Quiz-Froge. Und zum Loufe isch es momentan ohuere müehsam. Allport stossisch
miteme sone rote Pfoschte zäme. Was söll das eigentlich?
Stäffe: Das isch en Art Plan-Uflag vo de Willisauer Fusions
AG. Mir Rote vom Land hend üses neue Territorium markiert.
Cali: Aha. Jetzt isch mer au klar, worum alli schwarze Hönd
vom Städtli die rote Pföschte als Aseichstödli benötze.
Stäffe: Also, gömmer, s’isch no wiit bis zur
nächste Beiz. Aber gottseidank gitts z Willisau jo scho bald en U-Bahn.
Cali: Jo, sie sind scho fliissig am Loche. Die ersti Station
baue sie gägewärtig i de Chrone usse.
Stäffe: De cha de Püssu denn bequem mitem Zügli
hei und muess ned jede Obe sis Billet riskiere.
Cali: De müesst mer dringend no en Station im Foroom baue,
i dem Chrone-Satellit. Dodezue no en Quizfrog: Was braucht der Mesch, wenn er
ins Foroom geht?
a) das nötige Kleingeld
b) Schirm und Mantel...
Stäffe: ... Richtig. Das isch ganz klar b! Die Lüüt
vom Biscuit Hug hend a ihrem Wiehnachtsässe uf all Fäll ganz schön
gschlotteret.
Cali: Jawoll. Is Foroom ine sinds nochem Firmenmotto „chnusper
und pusper“ - usecho sinds pflöderig und schlapp.
Stäffe: Die wäre lieber i d Stadtmühli ufe go
sone Performanze luege.
Cali: Performance, heisst das.
Stäffe: Mer mache be üsne Gärtli hinde au so
nen Performance. Do chlätteret eine ufene grossi Sonneblueme ufe und hanged
denn drei Stund dranobe.
Cali: So, chumm jetzt. Mer wend fertig mache. Ich wott de hött
no Viktors Spätprogramm im Färnseh luege.
Stäffe: Das gett scho lang nömm, de Giacobbo hett
jo ufghört.
Cali: Stimmt. Das führt mi no zonere letzte Quiz-Frog.
Wer übernimmt die Nachfolge vom Viktor Giacobbo beim Schweizer Fernsehen?
a) Ursus und Nadeschkin
b) Ernst und Anna
c) de Büsi und s Hildi
oder d)...
Stäffe: ...de Cali...
Cali: ...ond de Stäffe!
Stäffe: Cali!
Cali: Stäffe!
Stäffe: Cali!
Cali: Stäffe!
Stäffe: Cali!
Cali: Stäffe!
|