Zur Hauptseite

 

E-Mail

Fasnacht 1997
Fasnacht 1998
Fasnacht 1999
Fasnacht 2000
Fasnacht 2001
Fasnacht 2002
Fasnacht 2003
Fasnacht 2004
Fasnacht 2005
Fasnacht 2006
Fasnacht 2007
Fasnacht 2008
Fasnacht 2009
 
Fasnacht 2010
 
Fasnacht 2011
Fasnacht 2012
 
Fasnacht 2013
 
Fasnacht 2014
 
Fasnacht 2015
 
Fasnacht 2016
 

Zur Verfügung gestellt von
ARONET GmbH

 

NARREMÄSS

Cali & Stäffe 2004

 

Einzug mit Trauermarsch

PROLOG

Cali:
Oje, oje, jetzt hemmer de Dräck!

Stäffe:

 Du besch jo au deför gseh. Bständig die eisiitige Fusions-Propaganda-Artikel.

Cali:
Aber ich ha doch ned erwartet, dass die das alles glaubed und tatsächlich fusioniere.

Stäffe:
 Und alles so überstürzt.

Cali:
Du hesch jo au immer deför gworbe. Bisch sogar mit dim Grind i de Ziitig gseh.

Stäffe:
 Vo öppis muess i dänk läbe, Tobu.

Cali:
Und jetzt hemmer de Dräck. Jetzt sind mer fusioniert!

Stäffe:
 Jetzt chönne mer üs abschminke.

Cali:
Jetzt hemmer keis Thema meh: D’Fasnacht isch tot!

Stäffe:
 S Duo Cali & Stäffe au!

Cali:
Die chömmer beärdige.

Stäffe:
 Also chomm, fiire mer no die letzti Narremäss.

Cali:
Es Requiem uf d Fasnacht!

 

INTROITUS

Cali:
Stadt und Land

Stäffe:
 Göhnd mitenand

Cali:
Hand in Hand

Stäffe:
 S’isch en Schand

Cali:
Ohni Not

Stäffe:
 Im gliiche Boot

Cali:
Schwarz und Rot

Stäffe:
 Das isch de Tod

Cali:
Truurig zum

Stäffe:
 Gedänke stumm

Cali:
Wemmer drum

Stäffe:
 Looslo nun

Beide:
Amen.

 

LESUNG

Cali:
Lesung aus dem Buch „Der doppelte Seppi“

Stäffe:
 Der eine Seppi sprach ganz rein
Wir Willisauer: wir sind EIN

Cali:
Der andre Seppi, voller Pein
Rief Nein und Nein und nochmals Nein

Stäffe:
 Der Seppi H.vom Grundbuch ach
Macht Inserate hundertfach

Cali:
`nen Flyer druckt der andre wohl
Der ist zwar farbig, aber hohl

Stäffe:
 So hat’s der Jazz-Guru gesagt
Als Ehrenbürger sehr gewagt

Cali:
Verstossen werden soll drum glatt
Der Nestbeschmutzer aus der Stadt

Stäffe:
 Statt Jazz gibt’s nun im nächsten Herbst

Cali:
Vom Stäffe Bluegrass bis es schmerzt!

 

GLORIA

Cali:
Zum Gloria erklingt das Loblied auf die Aussenquartiere.

Stäffe:
 Ehre sei dir, o Chäppalimatt
Zentrum bisch jetzt vo Landschaft und Stadt
Mir sind no frösch und nonig abgstumpft
Drum gründe mer jetzt en eigeni Zunft.

Cali:
Lob sei und Preis dir, Schülen-Schulhaus
D’Städter z’Lozärn, die stöhnd vorem Aus
S’glaubt a Kasärneplatz niemer meh
D Hochschuel, die chond uf d Schüle juhe!

Stäffe:
 Luut usem Moor Hosianna erklingt

Cali:
D’Sträggele-Zunft vom Ostergau singt:

Beide:
Üs lot si chalt, die grossi Fusion
Ewig sind frei mir und autonom!

 

PREDIGT

Stäffe:
 Vernehmt nun das Gleichnis vom überstürzten Einsturz eines alten Hauses.

Cali:
Es isch emol es Hüüsli gseh
Ganz alt und muffig scho, o weh
Die meiste Bälke störze ii
Mer rüeft der Baumaa schnell herbii

Stäffe:
 O Emil, Emil, chomm ganz gschwind
Es wäiht en starche rote Wind

Cali:
Zu all dem fallt au s Liecht no us
S wird schwarz und schwärzer i dem Huus
En Stromer bruchts ganz dringend jetzt
As Telefon de Huusherr hetzt

Stäffe:
 O Alois, tue los marschiere
Und s Hüüsli schnell illilumiere

Cali:
Es brucht jetzt no en Rächtsawalt
S Zunftmeisters Füess, die wärde chalt

Stäffe:
 Si Meinig weiss är ned genau
Und schickt drum eifach sini Frau

Cali:
Doch gross und grösser wird dä Schade
De Vater schreit und wott verzage

Stäffe:
 Im Sohn är gschwind telefoniert
D‘ Züri-Versich’rig alarmiert

Cali:
Doch dä wott kei Verlust riskiere
Sis Gschäft ned ganz und gar blamiere

Stäffe:
 För settig hoffnigslosi Fäll
Muesch d SUVA hole, seit är schnäll

Cali:
De Seppi wott nüd öberstörze
Dem alte Huus ned s‘Läbe chörze

Stäffe:
 Doch stoht är bald allei im Räge
Die Bälke nömme länger träge

Cali:
Die städtisch Muffia isch hin
Dä Bau vom Ancien Régime

Stäffe:
 Und gsänd die Junge das ned ii
Chönnts bald Martina am letzte sii.

 

Nachsatz:

Cali:
Jetzt bliibt als letzti Bastion
Halt bloss no d’ Korporation.

Stäffe:
 Doch die müend au no abem Thron
Und wenn ned morn, denn öbermorn.

 

 

KLAGELIED

Cali:
Klagelied

Stäffe:
 S schwarze Willisau isch tot
Wohe mer luegt, s isch alles rot

Cali:
En Sozi sitzt im Grosse Rot
Do hemmer jetze de Salot

Stäffe:
 Jo sälbst de Pfarrer muess jetzt wiiche
De Meyer tued uf d Kanzle schliiche

Cali:
De Buur und s Näll, die stäche nömm
Die höchsti Charte isch de Chöng

Stäffe:
 Hend Stadt- und Landröt zum Versaue
Müend Börgerröt au no verstaue

Cali:
En Abgang wönsche mir mit Stil:
Als Nothälfer in Roggliswil

Stäffe:
 D’Stadtmusig blost – s isch brutal –
De Rohrmatt-Sound vom Zillertal.

Cali:
De Värsli-Lee vom Harmonie
Wett en Concordianer sii

Beide:
Ond för die Alte vo de Stadt
Heissts „Breite eifach“ statt Zopfmatt!

Cali:
O wie friedlich isch es gseh näbenenand
Wenn das nur guet chond mitenand.

Stäffe:
 Wir wollen beten:

Beide:
Abenand
Isch die Wand
Zwösche Stadt und Land
Drum:
Händ enand
Mitenand
näbenand
hinderenand
underenand
förenand
öberenand
und dörenand
für jetzt und alle Zeit
Hallelujaaaaaaa!

 

ZWISCHENGESANG

Cali:
Zwischengesang

Beide:
Det äne am Bärgli, det stoht es alts Huus
Sie buddle und grabe, es isch gar en Gruus
Wotsch hürote muesch drum i d’Bachstube goh
Drum Fraue und Manne, löhnd d’Finger devo
Das Biispiel zeigt düütlich, wie’s im Läbe so isch:
Dass wenn d’wotsch hürote ned ganz bache bisch!

 

CONFESSIO

Stäffe:
 Wir bekennen unsere Sünden.

Cali:
Vo de Fäldmusig de Dirigänt
Goht noch de Musig gärn is Fäld
S gett im Verein es riese Gnusch
O wär är doch is Chambre rouge

Stäffe:
 De Crivelloski gross uftrumpft
Secundos chönd jetzt au i d’Zunft
Als nächste Schritt – es isch kei Chäs
Gsehsch bald die ersti Frau im Häs.

Cali:
De Postplatz hends neu konzipiert
D Verchehrsfüehrig wird ned kapiert.
D’Idee, die stammt, es isch kei Scherz
Vom Blocher und sim Kumpel Merz
Es gilt – öbs z Fuess oder mit Spritt
Ganz simpel eifach Rächts-Vortritt

Stäffe:
 Bschisse wird bi Wältrekörd
Lego, Zunft: Mir sind empört
Die Lego-Chetti isch en Lug
D’Karnöffel-Polonaise en Trug
Es Lauf-Genie hends importiert
De Imgrüth Hans reaktiviert!

Cali:
De Büsi wirtet woner cha
Au d‘ Goldwäscher, die nimmt er dra

Stäffe:
 Abwächslig bringt si Menü-Charte
Muesch eifach zwe bis drei Stund warte

Cali:
Am Mittwoch Steak und Wörscht und Fritt
Am nächste Tag de gliichi Hit

Stäffe:
 Am Friitig gitts en Überraschig
D Pommfritt sind hött bsonders rassig

Cali:
Am Samstig hett mer sich dra gwöhnt
Und gniesst die Wörschtli liecht verbrönnt

Stäffe:
 Am Obe muesch ufs Steak lang plange
Deför isch ihm no s Bier usgange

Beide:
Am Sonntig – Büsi bisch de Gröscht:
Gitts Wörscht mit Fritt, statt Fritt mit Wörscht!

Stäffe:
 Jo guet, de Büsi muesch verstoh. Är hett jo glichziitig au no müesse bim Open-air-Kino wirte.

Cali:
En Rieserfolg, das Kino – und das vo de IWG. Das heisst doch söscht: IWG - Immer Wieder Gwäsch.

Stäffe:
 S nächst Johr getts no die bessere Filme.

Cali:
Zum Biispiel s Erstlingswärk vo de beide neue Zunftgselle. Das isch Oscar-verdächtig. Es Schmuckstück, es Juwel, dä Streife: „Spann den Aff nicht auf die Folter“.

Stäffe:
 Und zum Dessert no ne Spotverfüehrig, äh Spotvorfüehrig:
„Hab einsam geblasen – Bekenntnisse der letzten Städtlihüülerin“.

 

 

FÜRBITTEN

Cali:
Wir wollen Fürbitte halten und dabei nicht nur an uns denken, sondern die ganze Welt einschliessen.

Cali:
Muskelstrotzender Ötzi Schwarzenegger

Beide:
Ein Habsburger wird Kaliforniens Retter.

Alle:
Ora pro nobis

Cali:
Michael Jackson darfst nimmer mehr singen

Beide:
Nie mehr „Ihr Kinderlein kommet“ anstimmen

Alle:
Ora pro nobis

Cali:
Bedauernswerte Bundesgerichtsjournalisten

Beide:
Ein Richter spuckt, der nächste wird pissen

Alle:
Ora pro nobis

Cali:
Otto von Sursee – welch ein Graus

Beide:
Schon wieder ein Restposten im Bundeshaus

Alle:
Ora pro nobis

Cali:
Beten wir für Kari Tschuppert einen Psalter

Beide:
Abgewählt im besten Bundesratsalter.

Alle:
Ora pro nobis

Cali:
Niedergemetzelte Ruth von Innerrhoden

Beide:
Völlig verlassen von dem da oben

Cali:
Hast vergessen, wir könnens nicht verstehen

Beide:
„So wahr mir Gott helfe“ zu flehen

Alle:
Ora pro nobis

Cali:
Bedauernswerte Metzger von Willisau

Beide:
Habt vergeblich geschlachtet so manche Sau

Alle:
Ora pro nobis

 

CREDO

Cali:
Und jetzt?

Stäffe:
 Fertig luschtig!

Cali:
Gitts wirklich kei Chance meh för d’Fasnacht? Mir müend doch eifach dra glaube.

Stäffe:
 Ja, s’eint oder andere Thema bliibt üs jo au noch de Fusion erhalte.

Cali:
Aber sicher, dänke mir nur a üsi Schuele.

Stäffe:
 Immerhi hett d Schuelpfleg scho es ganzes Johr kei Schlagziile meh glieferet – und sogar sit drü Johr kei Büecher meh verbrönnt!

Cali:
Nur mängisch handle sie es bitzeli überstürzt: Die hend doch tatsächlich gmeint, wenn de Villiger z Bärn obe zrogg trätti, gälti das auch für Willisau-Land...

Stäffe:
 Schad gitts kei Bundesrot Chrummenacher...

Cali:
Zerscht gitts jetzt no Stadtrotswahle.

Stäffe:
 Das isch längwiilig, die wend jo alli bliibe.

Cali:
Warts ab:Vielleicht wird doch no eine verschacheret.

Stäffe:
 Worum ned, schliesslich baue mer jo en neui Gmeind uf.

Cali:
Und de Stadtrot muess zögle in es neus Huus.

Stäffe:
 Ine Casa nova.

Cali:
Und de üsi Beize, die bliibed doch au es ewigs Thema.

Stäffe:
 Sie chöme ond göhnd, sie eröffne und schliesse – es isch es Chrüüz!

Cali:
Jo, jo: die wo de Schlüssel zum Erfolg ned finde, lade bald zum Schwane’gsang.

Stäffe:
 Immerhi hemmer jetzt au en Kebab-Lade im Städtli.

Cali:
Wotsche ässe guet und ned tüür

Kaufe türk’sche Kebab von Murat Üzgüür!

Stäffe:
 Und de Löie stoht au immer no.

Cali:
Es hett sich sogar es Komitee konstituiert: „Überparteiliche Bewegung gegen die überstürzte Sanierung des Löie“.

Stäffe:
 Und s Foroom isch de Inbegriff von de Klimakatastrophe: Four Seasons müësst mers taufe.

Cali:
Niene anderscht channsch nämlich die vier Johresziite a eim Obe erläbe: Bim Apéro pfiift der de Wind um d’Ohre, a de Versammlig früürsch der de Arsch ab, bim Nachtässe bechonsch Wallige und bim Dessert tropfet der s Rägewasser ufe Grind.

Stäffe:
 S’Hotel uf de Gulp hends au begrabe.

Cali:
Mir setze jetzt voll uf Bed&Breakfast.

Stäffe:
 S Metzger-Trixli bewiist weder emol Pioniergeist. Sie hed a de Goldwäscher-WM emene kanadische Zwöi-Töner mit Urwald-Maniere Gasträcht gä.

Cali:
Wo s Trixli im Chüelschrank noch ihre Joghurt gsuecht hett, isch sie fascht vonere Ladig Büchsebier erschlage worde.

Stäffe:
 Dä arm Goldwäscher hett sich jo bloss wölle Muet atrinke. Är het de Begriff „Bed&Breakfast“ nämlich wörtlich gno und hett gmeint, är müess vorem Zmorge no mitem Trixli is Bett.

 

AUFERSTEHUNG

Cali:
So, fertig jetzt. Mir müend s nächste Johr au no Stoff ha.

Stäffe:
 Jäääääää, de chöme mer wieder – trotz dere blöde Fusion?

Cali:
Natürlich: D’Fasnacht wird im neue Glanz uferstoh. Und mit ihre...

Stäffe:
 ...de Cali....

Cali:
...und de Stäffe!

Stäffe:
 Cali!

Cali:
Stäffe!

Stäffe:
 Cali!

Cali:
Stäffe!

Stäffe:
 Cali!

Cali:
Stäffe! usw.

 

 

 

 

 

 

 

 

...

Im Cali & Stäffe ehre Chnächt...